日本秋祭10月開鑼 逾百活動體驗東瀛文化

港人一向鍾情日本，黛安去咗「日本秋祭in香港魅力再發現-暨蘭桂坊日本嘉年華」嘅發布會，成個活動其實有兩部分，萬眾期待嘅「蘭桂坊日本嘉年華」係第二年舉行，今年以Cool Japan做主題，會喺11月10至11號舉行，由下午1點玩到夜晚10點。到時成個蘭桂坊會變成日本秋祭市集，有逾40個攤位，畀大家嘗試日本美酒佳餚，仲有表演欣賞，好似試着和風浴衣、傳統舞台表演、街頭巡遊等。

至於「日本秋祭in香港-魅力再發現」今年踏入第3屆，會喺10至11月舉行，屆時有多個團體參與，有超過100項活動，涵蓋娛樂、生活、教育等範疇。聽公關姊妹講，首次參與嘅海洋公園會將哈囉喂同卡通人物Sanrio家族成員融合，到時可以喺海洋公園同一班Sanrio家族成員影相。秋祭頭炮活動係11月5到11號喺蘭桂坊加州大廈舉行嘅「秋の限定店」，為大家帶嚟一系列日本元素、文化藝術同獨特娛樂表演，如藝術玩具同雕塑展覽，亦會舉辦唔同嘅工作坊，如柔道、花樣壽司、日本茶道等，畀市民體驗日本傳統文化。