聖雅各親子挑戰賽 推動惜食 兼助保育社區

放假規劃親子活動，除咗要好玩，最重要係有教育意義。聖雅各福群會公關姊妹近日就有好推介，原來今年佢哋特登以「惜食」同「保育社區」做主題，喺下個月舉行兩場好玩賽事。首先係要提提喺11月4日搶閘舉行嘅「親子2公里挑戰賽」，唔好睇少只係跑2公里，事前同小朋友傾點練習，點堅持完賽，已經可訓練到責任感同體育精神，最重要係家長一齊全程「陪跑」，打打氣之餘亦可「身教」小朋友運動嘅重要性呀！

加上賽事係為本港首間食物銀行「眾膳坊」籌款，令基層喺困難時唔止攞到食物，仲有奶粉同熱食暖肚，夠晒窩心。小朋友都可以學到食物有幾咁寶貴，大個謹記住「惜食」啦。

至於每年都好受歡迎嘅「We嘩藍屋」，今年就同本地薑「癲噹」合作，喺11月25日舉辦城市定向保育籌款賽，用「好鬼80年代」做主題，回顧經典粵語流行曲、港產片、廣告、街頭小食等八十年代香港風華，仲好鼓勵參加者帶埋小朋友一齊玩，了解本土文化發展同社區發展進程，夠晒開心夠晒FUN啦。姊妹又話，下周日（7日）前報晒兩個比賽，報名費即減$200，用$860就可玩晒，仲可享過千蚊優惠，真係要快手報定先啦。