翁祐學生再奪殊榮 澳洲動畫大賽三連霸

順德聯誼總會翁祐中學嘅同學又再為港爭光，贏咗第四屆澳洲科技遊戲節大賽嘅3D動畫國際組別冠軍。黛安在中秋時巧遇翁祐嘅陳嘉俊老師（Owen Sir），當然順便恭喜佢哋再創佳績啦。Owen Sir話今年派出讀中五嘅陳信一、曾偉超和錢錦達「參戰」，最終佢哋不負眾望，擊敗來自英、法、德同新加坡等超過25個國家嘅對手，以3D動畫短片「Into The Cosmos」奪冠，仲為學校攞到「三連霸」嘅威水成績。

陳同學話，短片嘅故仔係講述主角因醉心星空之美，一直夢想去太空漫遊，最後憑努力研發太空船而圓夢，希望觀眾睇完可以記住夢想，唔好輕言放棄。佢話今次作品首度用上大量後期特效，製作難度好高，「可以喺DSE前完成中學最後作品，仲代表香港攞到獎，非常值得！」評判都讚佢哋用嘅技術夠專業。

見到學生咁努力，副校監翁國基唔止捐咗30萬畀學校添置可捕捉全身動作同面部表情嘅動畫系統，仲額外捐出70萬，幫學校添置全新嘅學生電腦工作站！真係非常有心！