體驗中風後遺症 生活不便多 曹星如籲做好預防

神奇小子曹星如（Rex）自從舊年拳賽後受傷，到依家都未完全康復，但黛安最近就見佢「復出」，原來係同北京同仁堂合作，拍片支持「同仁關愛防中風2018」活動，仲親身體驗中風後遺症，就連呢位鐵漢都話，好難想像自己如果真係患病之後，仲打唔打到拳。

Rex經歷重傷後，更加體會到健康嘅重要。佢話受傷後，曾經試過連水樽都拎唔起，洗頭都要屋企人幫手，因為眼腫令到視力受影響，要太太陪住先可以出街，「當時覺得自己好無助同無能」。

今次佢就體驗模擬自己中風後遺症，左臂、左腰同左腿分別負重出拳操練，體驗中風者半身偏癱帶來嘅行動不便，同時戴上特製眼鏡體驗左眼半邊視力受阻嘅中風後偏盲病徵。試驗過後，Rex即刻話︰「好難想像自己仲打唔打到拳」。佢話因為半身偏癱問題，連平時習慣嘅練拳動作，都好力不從心，「手好重，發力好困難，而且左右好難平衡」，而視野有一半係咩都睇唔到，「就算飲啖水咁簡單嘅動作都好困難」。

Rex話，以前覺得中風離自己好遠，但依家趨向年輕化，經過今次體驗，感受到中風病者之苦，真係要做好預防，仲會提醒屋企人同身邊朋友，保持飲食均衡、生活規律、唔捱夜多運動、定期做身體檢查。

公關姊妹話，今次北京同仁堂主辦嘅「同仁關愛防中風2018」活動，係為「聖公會中風復康慈惠基金」籌款，幫助低收入嘅中風人士接受適切治療。詳情可以去http://www.WalkWithLoveTRT.com。