黛安
黛安

坐遊艇欣賞國慶煙花 生命小戰士夢想成真

發佈時間: 2018/10/03

坐遊艇欣賞國慶煙花 生命小戰士夢想成真

啱啱過去嘅國慶假期,黛安就同屋企人去咗睇煙花,仲遇上一班生命小戰士,一齊望住海景睇煙花,真係好震撼好靚。香港遊艇會同香港遊艇會慈善基金會,每年都喺國慶同農曆新年舉行慈善煙花夜,邀請一班志願機構嘅小朋友同海員到會所食晚飯同睇煙花。今年唔例外,邀請咗生命小戰士會、香港紅十字會醫院學校、香港紅十字會甘迺迪中心同海員之家,近100人出席。

其中6歲嘅李柏軒係生命小戰士,佢7個月大就被確診患神經母細胞瘤,經歷咗8次化療同1次手術,最終戰勝癌魔,但係右邊腎臟只剩低約1成功能。

原來柏軒特別鍾意睇煙花,覺得好似一朵朵大花,喺天空綻放光彩一樣,所以康復之後最想就係去睇煙花,今年終於唔使隔住電視去現場睇,夢想成真呀!

生命小戰士會主席及義工陳慧兒話,小朋友可以參加活動固然開心,但如果可以同家人一齊出席,共享天倫樂就更加美好。

撰文: 黛安 消息特靈八卦公關
欄名: 八卦名利場