虎紋紅豆抹茶登陸McCafé 脆皮朱古力新地強勢回歸

呢期虎紋茶飲大熱，但想歎茶唔使去台式飲料店嘅，行入McCafé都可以輕鬆歎番杯啦﹗麥當勞公關姊妹一早報料話，今日（4日）起全綫McCafé都有得食「McCafé×Vitasoy虎紋紅豆抹茶」系列。黛安首推梗係「虎紋紅豆抹茶」啦，一睇到香甜紅豆醬同濃郁西尾抹茶撞出鮮明嘅虎紋已賞心悅目，採用豆奶仲用上維他奶健康植物奶系列嘅「專業沖調用有機豆奶」，完全感受到美味與健康Go Green的完美演繹；而且打出嚟嘅奶泡又幼又滑，口感滿分，啖啖都係幸福嘅感覺。

不過，抹茶控梗係唔會就咁滿足，一定要試埋「紅豆抹茶蛋糕層層疊」，細味班戟皮、抹茶紅豆慕絲、紅豆粒同海綿蛋糕糅合嘅滋味，就知乜係真正「功夫菜」。公關姊妹仲話，為咗襯番虎紋主題，蛋糕都特登用抹茶粉同朱古力粉「畫皮」，想要打卡都絕無欺場。

用WeChat Pay HK 獲$10優惠券

想充實「甜品胃」，仲可以食埋強勢回歸嘅脆皮朱古力新地系列，姊妹建議用WeChat Pay HK買滿20蚊，即送10蚊電子優惠券，想食完再食都唔肉赤。黛安最想試嘅梗係「朱古力新地窩夫」，全港只得5間，包括金鐘海富中心、海灣街、太古城中心、又一城同機場客運大樓McCafé有得食，諗起熱辣辣嘅窩夫配上朱古力新地，仲有香甜朱古力醬夾埋鬆脆嘅OREO®碎同OREO®威化卷，真係諗起都流口水。