黛安
黛安

森美分享親身經驗 助ADHD小朋友克服困境

發佈時間: 2018/10/04

森美分享親身經驗 助ADHD小朋友克服困境

小朋友有專注力不足或過度活躍症(ADHD),做家長當然心急如焚。不過有ADHD唔代表影響日後成就,好似DJ森美,雖然細個時都因有ADHD令佢學業、社交有困難,大個做嘢都未必得心應手,但好彩佢性格樂天,鍾意搵方法解決困難,仲好熱心向同路人分享秘訣!

黛安知道近排森美都參與咗恒生—YMCA快樂「球」學計劃,親身走訪學校同有ADHD、特殊學習障礙、言語障礙同聽覺障礙等,有特殊教育需要嘅小朋友分享經歷,仲一齊學扭熊貓氣球。

令黛安最印象深刻,係森美話呢個世界對於有特殊學習需要嘅學童存在好多誤解,所以同學仔要識得自我肯定,勇敢講出困難同問題,「唔使怕畀人誤解,反而應該話畀老師同屋企人知,一齊去面對。」

森美仲話,有不足唔等於要氣餒,只要每日都比昨日嘅自己有進步,積少成多,最後都可以做到成果嘅。睇番森美依家嘅成就,大家都知世上無嘢可以阻住努力嘅人前進啦。

撰文: 黛安 消息特靈八卦公關
欄名: 八卦名利場