有人話愛靚唔愛命係女人嘅天性，但為咗靚到底可以去到幾盡？最近陳浩民老婆蔣麗莎去咗挪威旅行更勇闖北極圈，冰天雪地正常都係坐吓雪橇、追吓北極光咁，但蔣麗莎竟然換上比堅尼，喺負10度嘅寒冷低溫下，大晒46吋長腿，同雪雪玩遊戲。
不過大家可能會奇怪，喺戶外負10度，乜水都結晒冰啦，仲點著泳衣游水？為免大家估估吓，蔣麗莎開估話畀大家知點解著比堅尼：「站在北極圈，-10度來一組值得紀念的片子。」原來係為咗做紀念，問你服未？而網民睇見佢喺冰天雪地都咁樣派福利，即時Like爆，仲有人好抵死咁話：「我都想著丁字褲喺北極圈同妳玩雪呀！」
選美亞軍收服陳浩民
其實又難怪網民咁冧嘅，事關蔣麗莎原來係世界環球比堅尼小姐亞軍，兼獲得最佳身材與最上鏡獎，而最令人妒忌嘅係佢生咗四個，但身材一啲都無走樣，難怪一向緋聞多多嘅陳浩民，都被佢成功收服，馬騮精都變咗住家男啦！