Uber Eats兩周年 推半價優惠兼免送餐費

黛安身邊好多朋友都係「無飯夫妻」，經常叫外賣，所以外賣App都好受歡迎，其中Uber Eats已經來港兩年喇，推出咗免送餐費同半價優惠，等大家食得開心！公關姊妹同黛安講，過去一年全年落單最多嘅用戶，一共落咗354次單，即係幾乎每日都用Uber Eats點餐，而每月落單最多嘅，亦有67次，即係每日超過兩餐。

依家叫外賣咁方便，公關姊妹仲話，全港最多人叫外賣嘅住宅區係大角咀奧運站、火炭站、荃灣站同太古站，名副其實係港九新界都有「適食達人」！而港人最鍾意叫嘅食物，離唔開分量大件夾抵食嘅中菜、廣東菜，佔咗平台點餐近60%之多，其餘亞洲菜同西餐就各佔咗20%。

原來港人對米綫、雞同雞翼都情有獨鍾，一直都係熱門外賣食品，仲有綠茶、紫薯、芝士等，而今年火速上位嘅一定係黑糖食品，皆因相關食品過去一年嘅銷量增加咗3倍咁多！

黛安就最鍾意食香港仔南記、祥興記、榮式雞排，間間都可以喺Uber Eats叫到外賣。Uber Eats香港區總經理林灝哲話，呢兩年Uber Eats喺香港嘅發展成績相當理想，由最初獲200間合作餐廳支持，到依家有成2,500幾間，兩年間就增長咗近13倍。

Uber Eats今年踏入兩周年，佢哋推出咗兩項優惠，包括現時用戶喺超過50間指定餐廳落單，就可以免送餐費，包括麥奀雲吞麵世家、喜遇等等；另外，新登記用戶喺超過100間指定餐廳落單，更加有半價優惠，包括麥當勞、Jollibee、香港仔南記、左麟右李等等。黛安已經諗好今日lunch食咩啦，你呢？