Panasonic新相機登場 全方位操控 充滿玩味

秋天的確係個外遊同影相嘅好季節，黛安噚日去咗Panasonic嘅新相機發布會，佢哋推出嘅LUMIX LX100 II係LX系列嘅第7代型號，新機配備4/3吋大型高感光MOS感應器，採用2,177萬像素嘅感應器，有效像素達1,700萬像素；又採用F1.7-2.8 / 24-75mm LEICA DC VARIO-SUMMILUX變焦鏡頭、9片光圈葉片令拍攝可以造出更圓滑散景；加上機身有多個獨立轉盤同控制環，如光圈、快門、補償光等，方便用家操作，呢部機將喺11月開賣，零售價8,280元，絕對物有所值！

LUMIX LX100 II設4︰3、3︰2和16︰9嘅攝影比例，並維持24mm超廣角視野拍攝，亦具備「先拍照後對焦」功能，用家可以影相先，再揀焦點區域。相機嘅實時觀景器可以感應眼睛，會配合用家嘅動作自動開關。

同場又介紹咗「5防」相機LUMIX TS7，即係防水（31米）、防麈、防撞（2米）、防寒（攝氏零下10度）同220磅防壓功能，仲設有指南針同高度計，適合喜愛戶外活動人士，呢部機已推出咗個幾月，零售價4,090元。