正所謂樹大招風，尤其當紅藝人個名咁有價值，好容易成為不法份子目標，最近就有人冒認譚詠麟開設facebook帳戶招搖撞騙，騙徒仲完全照抄校長個page，唔認真啲睇隨時出事，難怪校長都好緊張勸大家要小心：「各位請注意，近日又有人冒認我的Facebook 去私訊大家，敬請各位小心，本人絕對不會用私訊聯絡大家溝通。本人再次鄭重呼籲大家小心，不要受騙！」
其實不法份子不時冒名扮藝人詐騙，絕非新事，不過他們的手法多變，加上懂得利用粉絲想親近偶像的心，一不小心隨時中招。
鍾嘉欣 擺酒收人情
2016年鍾嘉欣宣布閃婚，但有人竟然自製鍾嘉欣的微信圈，內裡放滿婚訊消息，並留言話將於溫哥華補擺喜酒，更不斷向陌生人send短訊：「你不來，紅包也不發一個，一生人就一次，你說你好意思嗎？」唔少收到訊息嘅人都話，估唔到自己係識嘉欣bb喎！
范冰冰 籌錢交罰款
范冰冰要繳交8.83億人民幣罰款的消息曝光後，即有自稱「范冰冰」的人士四出send短訊，聲稱只差五百蚊就籌夠錢，仲話只要你肯畀嘅話，就會請你做經理人，年薪仲有500萬人民幣咁多，問你服未？
林保怡 合照惹禍
遇上粉絲要求合照，藝人大多有求必應，但林保怡就遇上慘痛經歷，有人竟然借合照騙財，搞到佢都好無奈：「有啲人拎住同我合影嘅照片招搖撞騙，我每日同唔少人影過相，唔影又唔得，但我真係分唔到佢哋係好人定壞人。」
林峯 騎呢演唱會
內地一向是藝人的掘金聖地，加上地大脈博，騙徒容易魚目混珠，之前就有不法份子冒認林峯，聲稱舉行《「林」距離演唱會》，令不少粉絲中招被騙，搞到林峯的經理人公司要急急發聲明澄清，並保留法律追究權利。