黛安
黛安

大家樂創立半世紀 新書見證港人生活

發佈時間: 2018/10/08

大家樂創立半世紀 新書見證港人生活

港人好熟悉嘅連鎖快餐品牌大家樂,今年創立50周年,不知不覺就陪伴咗港人達半世紀,所以希望透過出書同港人分享企業嘅發展歷史,由1968年於銅鑼灣糖街開第一間大家樂,到今日擁有165間分店,見證港人生活嘅歷史變遷。黛安就有幸出席《香港人的大食堂—再創嘗樂新世紀》嘅新書發布會,見到大家樂第三代掌舵人、首席執行官羅德承,佢仲同黛安講咗好多鮮為人知嘅故事。

羅德承話,最希望讀者透過本書去感受大家樂喺香港嘅變化同角色。佢又分享唔少趣事,例如一直緊貼港人飲食習慣,當年籌備「一人火鍋」嘅過程就最深刻,「當年我負責採購,用咗好耐時間研究,亦投資過百萬喺器材方面,一推出就好受歡迎。」大家樂仲係首間連鎖快餐店推「一人火鍋」。

而最出名嘅「一哥焗豬扒飯」,原來經歷咗4次改良以適應港人口味變化,好似甜酸比例、豬扒要厚切等。羅德承又話1977年大家樂曾發生重大變化,包括開始涉獵其他業務,仲喺電視播全港首個餐飲業廣告!

呢本書嘅兩位作者,包括港大社會學博士王惠玲、同加拿大麥基爾大學經濟學博士高君慧,佢哋透過訪問超過30位大家樂成員,以口述歷史形式結集成書。佢哋話大家樂嘅營運方式體現到「港式創意」;至於書名叫「香港人的大食堂」,係因為「大食堂」呢個詞語畀港人有「屋企」同經常去嘅感覺,易引起共鳴。

撰文: 黛安 消息特靈八卦公關
欄名: 八卦名利場