馬會捐$900萬建5000呎培訓中心 首批導盲犬年底「出更」

狗狗除咗係人類最好嘅朋友，更加係動物界工作能力No.1嘅表表者。好似專陪視障人士出行嘅導盲犬，就肩負起陪伴、導航同保護嘅重責，令視障者可隨心所欲去探索世界。上周六（6日）專係用嚟繁殖同訓練本地導盲犬嘅「賽馬會教育及培訓中心」正式開幕，年底預計就會有首批本地自行培育嘅導盲犬服役。

位於觀塘翠屏南邨嘅中心環境非常好，佔地達5,000呎，內設犬隻訓練場、模擬居室等，確保狗狗喺最舒適嘅地方培訓同做配對服務，目標係每年訓練12隻導盲犬「出更」。

部分醒目狗狗仲會接受特別訓練，為自閉症等有特殊需要學童做動物輔助治療，提升佢哋嘅身心同社交能力。馬會慈善及社區事務執行總監張亮話，馬會2年前已捐咗900萬元成立中心，未來3年中心嘅營運開支，馬會都會幫手，希望教育大眾接受導盲犬，令視障人士用公共交通工具出行都可無障礙。