UNICEF HK藝術展推動關愛兒童 以愛點亮慈善之光

平時黛安都鍾意行下藝術展，嚟緊仲可以邊睇展覽邊做善事！事關UNICEF HK將會喺10月19日至11月1日喺ifc舉行「以愛點亮慈善之光」慈善藝術展，用藝術喚起大家嘅善心。

公關姊妹同黛安講，今次展覽會展出兩位中國當代藝術家鄒操同埋任震宇嘅16幅作品，佢哋會用獨特嘅創作風格，為貢獻非凡嘅13位名人繪製肖像，其中包括柯德莉夏萍、德蘭修女、李光耀同埋李小龍等等，透過畫作感受佢哋對兒童嘅關愛，仲會展出佢哋嘅經典語錄！

除咗睇展覽之外，大家仲可以參與「讓愛傳下去」嘅活動，選擇咗你最喜愛嘅名人肖像之後，就會獲得一張電子明信片，每寄出一張明信片，展覽創作夥伴Art Futures Group就會捐出港幣5蚊，支持UNICEF全球為兒童嘅工作，真係好有意義呀！

寄一張明信片 即捐贈$5

UNICEF HK總幹事劉玉燕話，好開心UNICEF HK可以舉辦首次慈善藝術展，佢相信藝術可以超越時間同界限，正如呢13位慈善家通過仁愛善行，唔單止喺有生之年改變生命，仲可以遺愛人間，咁有意義，記得去支持下呀！