夥藝術家製海龜牆飾 肯德基「走塑」推環保

一向着重環保嘅黛安，知道肯德基繼早前停止主動提供塑膠飲管同杯蓋畀顧客後，至今已慳咗1,000公斤（約100萬件）嘅塑膠飲管同杯蓋喇！最近佢哋又計劃喺今年底推出新設計嘅「三指手套」，只會提供畀有需要嘅顧客，希望進一步為減塑出一分力。肯德基仲同跨媒體藝術家Natalie Wong合作，利用早前回收嘅塑膠飲管同杯蓋製成咗一隻海龜牆飾，呼籲大家繼續關注環保。

香港及澳門肯德基行政總裁袁柔敏同黛安講，好感謝顧客支持無飲管無膠蓋嘅活動，明白環保要持之以恆，所以會制定不同計劃，更有效減塑。Natalie Wong就話，用咗一個月時間，以2,000幾件飲管同膠蓋完成呢次海龜牆飾創作，希望借此機會展示環保藝術有趣嘅一面，同時喚醒大家對環境同海洋生態嘅關注。