《全民造星》 細貓苦盡甘來

ViuTV真人騷《全民造星》十強細貓（應智越），曾在韓國當練習生，韓味十足加上唱歌跳舞的實力，絕對是比賽中黑馬之選。不過細貓坦言在韓國日子艱苦，直至回港參加比賽，得到家人朋友認同，才有苦盡甘來的感覺。

擁有一把獨特靚聲的細貓，六歲起學鋼琴，長大後更到韓國讀音樂、當練習生，又曾參加內地節目《偶像練習生》。識作曲、能唱擅跳，理應自信爆棚的他卻說：「其實我係一個好無自信嘅男仔，當初去韓國做練習生，加上讀書同做兼職，同朋友好疏遠，有時好無助。」後來決定從韓國學校請假回港參賽，才令他感受溫暖：「有朋友會message我，叫我畀心機，原來一直以來我咁辛苦係有人認同，同埋比賽識咗大班好朋友。」

細貓坦言，起初家人勸他別發明星夢：「佢哋話我唔會贏，到時都要返去韓國讀書。後來佢哋睇到節目，從中聽我講述喺韓國嘅生活同學習，見到我唱歌跳舞都好開心，亦支持我嘅決定。」

決賽打定輸數

對於比賽成績，細貓笑言已打定輸數。「我覺得香港市場需要帶動氣氛嘅偶像，我睇好肥仔，我覺得佢喺舞台上好有感染力，好本地、好有親切感。」

細貓透露決賽當晚除表現跳唱外，更會演繹自己的作品，又表示比賽至今，自己也沒有做太多拉票的行動：「我唔太鍾意做好多拉票行為，覺得做好每場表演就得，因為我覺得『努力的孩子，不一定有好的結果』。」他笑說這句話與決賽表演內容有關，希望觀眾到時留意。

撰文︰李詩慧

攝影︰林良明

編輯︰李潔盈

美術︰梁政敏