跟住龔仁心「真‧挖礦」 高科技體驗馬鞍山礦場史

挖虛擬貨幣嘅「礦工」聽得多，大家又知唔知上世紀50年代香港都曾經有成萬名「真礦工」呢？下個月4日舉行嘅「華懋行」就揀咗喺馬鞍山郊野公園出發，途經三級同二級歷史建築「鞍山探索館」及「240ML礦洞」，邊行邊可用AR、VR及AI技術，學下馬鞍山礦業歷史；今年華懋行已係第8年舉辦，會分兩條路綫，今個月29號就截止報名，報名記得要快喇。

黛安早排就率先同華懋集團執行董事兼管治委員會主席龔仁心一齊試行，咪睇龔醫生已75歲，佢着住恤衫皮鞋都行得勁快，仲「挑機」話要同黛安鬥快行！

龔醫生話最想大家郊遊嘅同時，可了解香港歷史，提高保育意識。

佢仲同黛安講，依家每日都會準時9點返工，第一時間就係睇報紙，睇下土地問題嘅最新發展，希望政府做決定前可平衡各界利益，「填海又好、發展高爾夫球場又好，點都有人反對，做政府就係要識點平衡各方利益。」

機會難得，梗係要請教下龔醫生有乜養生心得。龔醫生話，唔使戒口㗎，只需每周最少行一次山，加埋飯後散步20至45分鐘，就可以好似佢咁精神爽利。