Toys"R"Us日本玩具嘉年華 海運旗艦店變秋祭樂園

玩具係好多人嘅兒時玩伴，黛安都唔例外，日本國駐香港總領事館同玩具“反”斗城合辦日本玩具嘉年華，等大家可以玩番夠本！玩具“反”斗城位於尖沙咀海運大廈嘅旗艦店由即日起至10月29日，化身秋祭玩具樂園。

黛安就去咗活動開幕禮，玩具“反”斗城大中華及東南亞地區首席商務官何楚嫣就話，今次首次同日本國駐香港總領事館合作，可宣傳日本文化好開心。旗艦店入口區有一個高達10呎嘅鳥居，打卡一流！

除咗打卡，仲有得玩！黛安知道，店內將於10月27日舉辦日式文化體驗工作坊，小朋友可試着日式祭典浴衣同埋木屐，仲可學習紙藝同埋玩下太鼓，風靡萬千小朋友嘅熊本熊人偶，仲會喺指定時間出現同「粉絲」嚟個愛的抱抱呀！