由頭帶到尾、有「嫩版彭于晏」之稱的姜濤，最終不負眾望以大熱姿態勇奪ViuTV《全民造星》冠軍，獨吞一百萬獎金，年僅19歲就已成為百萬富翁，姜濤唔止睇得、唱得，仲要萌到爆，深得唔少姐姐歡心，就連出名Cool到震的劉美君都被姜濤融化，可見呢位小鮮肉魅力有幾勁！不過人紅自然是非多，姜濤參選以來，唔少網民不斷發放有關佢嘅黑材料，好似呢頭佢喺節目自稱未拍過拖，仲係處男，轉個頭佢同異性嘅親密相就喺網上廣泛流傳，幸而呢啲是非流言並無損害佢嘅高企人氣，況且與其被踢爆，不如玩自爆！
自揭曾被踢出校
最近姜濤就喺ig親撰悔過書，自揭當年讀書嗰陣曾經被踢出校：「以前我只是一個胖胖的學生，因為沒自信上課經常搗亂，白白的荒廢了我在中學的時光，被導致退學，還記得我媽媽在炎熱的夏天帶我去一間間的找中學，可是就連＂最不好的中學也不肯收我...＂」而對於外界的負面攻擊，姜濤亦處之泰然：「很多人都覺得我走到今天這一步都是靠＂運氣 ＂，我不否認，畢竟演藝圈就是需要靠運氣的，不過或許只有我自己知道，減肥跑步時留下的一滴滴的汗水，或許只有這些汗水知道我吃了多少苦，只有這些汗水知道我被多少人＂看不起＂，或許等這個節目完了之後，你們會慢慢地淡忘我，不過我知足了。」而姜濤的真情剖白，更獲得不少粉絲留言支持。
為愛情發奮減肥
其實一路走來，姜濤真的吃過不少苦頭，事關佢並非天生靚仔，原來今日的小鮮肉，讀書時期是一名肥仔，體重接近二百磅：「讀小學三年級開始，自己經常食老麥，令體重急升，食兩個餐，過半個鐘又肚餓，臨瞓前仲食多兩個漢堡包，當時被人話肥仔只會覺得意，唔會無自信，後來小學升中學，我肥到要見醫生，因為體重差唔多有二百磅。」而令姜濤決心減肥，全因愛情魔力：「自己鍾意嘅女仔同咗第二個一齊，嗰個男仔係靚仔，於是我就減肥，但我唔識減，一係唔食嘢，一係食水果，食完就係咁跑，後來讀運動教練課程，我先識點樣減。」
如今姜濤已貴為娛樂圈搶手貨，他坦言會全力追夢，暫時放低讀緊嘅運動教練課程，目前有一個廣告、兩套劇在手的他，有指已與ViuTV簽了五年賣身契，，與此同時亦有三間唱片公司希望簽佢做歌手，足證姜濤家陣有幾勁。而除了有名，最緊要還有利，獨得一百萬獎金的他笑言：「暫時未諗到啲錢點用，但第一件事係諗到要食好嘢，同貢獻畀父母，當然仲要請台前幕後食飯。」啱嘅，做人最緊要係係唔好忘本，抵姜濤咁受歡迎嘅。
其實《全民造星》不單捧紅了姜濤，還製造了不少優質小鮮肉，當中亞軍是24 歲Ian陳卓賢、季軍Lokman楊樂文同樣有不少粉絲支持，不過要數於決賽當晚最出位的定非黑馬肥仔梁業莫屬，其演出連評判之一的周慧敏亦讚不絕口，外界反應咁熱烈，難怪ViuTV表明出年會再拍《全民造星》啦！