曾經監製過《刑事偵緝檔案》系列、《鑑證實錄》系列、《衝上雲霄》與《On Call 36小時》等經典作品的TVB退休監製潘嘉德，最近在中環擺七十大壽，吸引不少星級好友前來賀壽，不過講到最受注目當然是十年前有份飾演《少年四大名捕》的四大主角馬國明、林峯、吳卓羲與陳鍵鋒驚喜現身。想當年四位當紅小生迷倒萬千少女，陳鍵鋒因為唇紅齒白被讚為最靚仔，堪稱小鮮肉鼻祖，相反馬國明就因為面上佈滿火山洞，被指顏值包尾。但估唔到事隔十年再聚頭，佢哋嘅處境竟然掉轉，四十四歲的馬國明獲讚keep得最好，睇落完全唔似四字頭，相反只得四十歲的陳鍵鋒，身形唔止脹了一個碼，個樣更被網民譏為發水麵包，由當年「少年四大名捕」之首，慘變今日「中年四大名捕」之末，更有網民質疑陳鍵鋒係咪掛住賺人仔去到太盡，捱到殘晒呀：「人仔係好賺，但都要顧住個樣架，脹成咁，小心嚇走粉絲呀！」
其實自從2010年約滿TVB後，陳鍵鋒專心北上發展，曾經拍過《美人心計》、《烽火佳人》與《封神英雄榜》等等，更曾獲韓國首爾電視劇大獎中國區最佳男主角，成功闖出一片天。雖然名利雙收，但箇中辛酸絕不為外人道，如拍《美人心計》時唔單止要忍受霧霾天氣，更要同陽光玩遊戲：「我喺劇入面飾演漢朝皇帝，日日喺四十度高溫下著住龍袍，唔使一陣就成身汗，真係幾辛苦。」咁捱法，難怪走樣走得咁快啦！ 而由於最近陳鍵鋒回流參演港台劇《火速救兵IV》，題材與TVB 的《跳躍生命線》相近，網民更拎佢同50歲嘅馬德鐘比較，笑陳鍵鋒飾演消防員，但身形明顯同做救護員嘅馬神差一截，仲提佢小心被人革扯喎！
當年組成新五虎將 經典《少年四大名捕》好好睇
講真班網民可能尖酸咗少少，但正所謂愛之深，責之切，當年的《少年四大名捕》確實令唔少人留下難忘回憶，該劇遠赴雲南取景，他們分別飾演擁有超凡智慧的「無情」、正義感滿瀉的「鐵手」、輕功絕頂的「追命」與武功高強的「冷血」，在林嘉華飾演的諸葛先生領導下，偵破花石綱官員失蹤事件、瘟疫村瘋醫殺人事件、武林幫派孤島殺人事件等多宗奇案，四處伸張正義，為民請命，難怪當年收視高達37點。
不過由於主角太多，是非自然多，有指當時已與TVB關係麻麻的陳鍵鋒，有關方面為免其角色太搶，刪走了他與吳卓羲於第七至十集中扮鏢師查案與追女的部份戲份，加加埋埋刪去足足有一集咁多，時至今日仍有粉絲在討論區投訴TVB浪費人力物力，令劇情不連貫，更令《少》出現兩個版本，海外低清版有完整二十五集，但本地則只有二十四集。