渣打藝趣嘉年華 巨型發光木偶闖入銅鑼灣

每到周末，黛安都會諗下邊度係打卡好去處，11月頭就有着落喇，因為一年一度渣打藝趣嘉年華又嚟啦！今年嘉年華會喺下月3、4日喺維園舉行，到時除咗有巡遊表演睇，仲有16個免費藝術攤位DIY面譜、頭飾同埋60個表演團隊演出！

由香港青年藝術協會主辦、渣打銀行慈善基金贊助嘅「渣打藝趣嘉年華」已舉辦到第18年喇！今年就用咗家傳戶曉嘅兒童文學《綠野仙蹤》做主題，一連兩日嘅嘉年華有連串精采活動，包括咗兩個大型木偶巡遊：夜光巡遊同壓軸巡遊。

公關姊妹同黛安講，今年嘅「夜光巡遊」打造咗7座巨型發光木偶，仲配合埋舞蹈表演！而「壓軸巡遊」就有12座4米高嘅巨型木偶，包括邪惡嘅西方女巫同埋巨大兇猛嘅怪獸卡力達等，帶領住700人嘅巡遊隊伍，場面一定好熱鬧！而且今年仲新增「翡翠城最佳造型比賽」，事關喺《綠野仙蹤》故事裏面嘅翡翠城，幾乎所有人身上嘅物品都係綠色，所以比賽鼓勵參加者着上綠色造型嚟現場，影完相之後上載去Instagram，再標記#AIP2018green，就有機會贏到豐富獎品，包括主題公園入場門票同埋自助餐禮券，記得mark定日子嚟玩喇！