又一城20周年 睇精采表演兼大抽獎

黛安好鍾意行商場，聽公關姊妹講，今年又一城踏入第20個年頭，為咗同市民一齊慶祝，特別舉辦「又一城20周年幸運賞」活動，有表演睇之餘，仲有大抽獎，齊齊慶祝又一城20周年！

又一城咩品牌都有，又多餐廳選擇，啱晒一家大細。姊妹話，慶祝活動由下個月10號至25號開始，請嚟香港著名表演隊伍，一連3個周末為市民帶嚟唔同嘅精采音樂同舞蹈表演，包括香港青少年管弦樂團、香港中文大學校友會聯會張煊昌中學步操樂團，以及SDM爵士芭蕾舞學校同Twinkle Dance。第一場就喺下個月10號，由香港青少年管弦樂團演奏嘅管弦樂表演，時間係下午2點半同4點正。

姊妹仲話，睇表演期間，會向現場觀眾送上幸運大抽獎，每場名額100個，幸運兒隨時抽到又一城購物禮券、Garret爆谷、Häagen-Dazs雪糕券、Pacific Coffee咖啡券、Venchi巧克力禮盒，或其他商戶優惠驚喜禮遇！節目同優惠咁豐富，快啲約埋姊妹去行街睇Show兼抽獎啦！