跟WWF環保食海鮮 善待海洋傳承滋味

唔少人都鍾意食海鮮，不過係飽口舌之福嘅同時，都要注意對環境嘅影響。世界自然基金會（WWF）香港分會喺下個月10至18日舉行第3屆環保海鮮周，除咗獲30間食肆響應提供環保海鮮菜單，嚟緊11月9日至11日先係觀塘海濱花園搞「重拾本地鮮味市集」，用環保海鮮炮製港式魚蛋、吞拿魚雲吞等小食畀市民試食。大會仲由11月17日起，分4日搞「漁業之旅導賞團」，等大家有機會去本地魚場、流浮山蠔排及淨化中心等，望下我哋食嘅海鮮係邊度嚟，仲可以聽漁民分享趣事！

公關姊妹話，想參加導賞團200蚊就得，下個月1日前報名仲有早鳥優惠即減50蚊。WWF香港分會高級項目主任黎姵延都話，一直鼓勵海鮮業界透明同負責任咁採購，為海洋生態帶嚟正面影響，今次仲有兩大學校膳食供應商承諾提供環保海鮮午餐選擇，全港有一半小學都可以受惠㗎。