多啦A夢登陸奧海城 用秘密道具陪你過聖誕

話咁快已到10月中，普天同慶嘅聖誕節得番2個幾月又就嚟到喇！黛安知道，雖然時間尚早，但唔少商場已好好裝備迎接聖誕來臨！好似奧海城同德福廣場咁，就分別會用廣受歡迎嘅多啦A夢同泰迪熊做主題，由佢哋陪大家過聖誕，有得打卡之餘，亦夠晒驚喜，黛安都好期待啊！

多啦A夢可以話係唔少人嘅童年回憶，但有無諗過自己可以晉身成為道具研究員，體驗來自22世紀秘密道具嘅神奇功效呢？黛安知道，「多啦A夢秘密道具研究所」將於11月中登陸奧海城，多款秘密道具，好似隨意門、時光機、記憶麵包等，任你測試，粉絲們記得唔好錯過啊！

唔止咁，研究員到時仲可以體驗其他秘密道具嘅神奇功效，好似可以走入通往時光機嘅櫃桶，由多啦A夢駕駛時光機，帶領大家喺時光隧道穿梭，亦可以親身體驗隱形斗篷等，相信到時絕對係聖誕打卡熱門地點！

為咗招募更多研究員，佢哋下星期五（26日）開始一連3日，仲會喺尖沙咀、旺角同中環一帶設置流動研究員招募站，畀參加者可試玩巨型夾蛋機，超過7,000件秘密道具禮品任你夾，記住到時去捧場啊！

百隻泰迪熊現身德福齊打卡

聖誕活動又點止一個！黛安知道，德福廣場今年亦特別同德國百年泰迪熊品牌Steiff攜手打造「泰迪熊聖誕」，下個月5號開始，就會有一個4米高，以路德維希二世國王造型亮相嘅毛毛泰迪熊現身商場，仲有過百隻、超過20款造型泰迪熊喺不同角落同大家開心迎聖誕，齊齊暢遊傳統德國聖誕村莊，親嘗當地各種地道美酒佳餚，黛安真係好期待可以快啲同成班姊妹去打卡啊！