煤氣公司「轉廢為能」項目 榮獲國際能源大獎

地球資源好珍貴，絕對唔可以浪費。好似煤氣公司，兩年前就喺那打素醫院建立咗一個由沼氣推動嘅熱電聯供發電系統，可以做到回收重用，每年幫醫院慳過百萬費用，仲奪得2018年度美國能源工程師協會（AEE）頒發嘅亞太區「區域能源項目獎」，認真厲害啊！

聽公關姊妹講，煤氣公司工程團隊，一直積極研究用新界東北堆填區嘅堆填區沼氣，作為發電機能源可行性，經過不斷嘗試同改進，終於喺兩年前，於那打素醫院成功建立咗呢個發電系統。將原來運送沼氣到大埔廠房嘅管道延伸，另建造一條650米支綫，提供沼氣到醫院作為推動發電機嘅能源。

通過呢個系統，醫院會將沼氣發電機產生嘅煙氣同冷卻水餘熱回收，生產蒸氣同熱水，畀醫院消毒、洗衣等。煤氣公司市務及營業總經理黃維安話，系統總效率達87%，仲可以減少垃圾堆填區產生嘅溫室氣體，絕對係客戶、煤氣公司同公眾嘅三贏方案！

呢個系統仲獲得認同，前日喺美國北卡羅萊納州夏洛特榮獲AEE亞太區「區域能源項目獎」啊！