TVB很喜歡把藝人角色定型，例如李天翔是黑社會或強姦犯、李璧琦是情婦、袁偉豪是西裝友等等，而過去那些年身形高大健碩、膚色黝黑、一臉正氣的馬德鐘往往被安排飾演紀律部隊，如警察、消防。除了外形優勢，馬德鐘入行前曾加入警隊，早在中三畢業後受到兩位做警察的哥哥影響，加入學堂受訓兩年，先後成為警員、軍裝巡邏小隊、警察機動部隊、便裝特遣隊，甚至擔當G4要員保護組。G4有警隊精英先可以做，要經過一連串嚴厲、艱辛嘅體能考核，呢啲經驗令佢演紀律部隊維肖維妙，難怪今次馬德鐘回歸TVB，亦都要穿起制服做救護員。雖然其角色一樣搶盡風頭，但講到馬神最耍家嘅始終係「老本行」—警察，佢仲由散仔做到督察，個個角色都入型入格，唔到你唔服！
《O記實錄》《O記實錄II》
馬德鐘在1995年《O記實錄》飾演警員司徒文安，當時黃日華與郭可盈做主角，他是陳桂（蔡國權飾演）和吳國兆（陳榮峻飾演）的屬下，雖然只是閒角，但在有限戲份中依然搶鏡，唔止拍續集有佢份，更為日後的主角之路奠下基礎。
《陀槍師姐》
馬德鐘在1998年《陀槍師姐》飾演軍佬梁向東，是西九龍重案組的警察，雖然只是魏駿傑下屬，但由於兩人同樣走高大威猛路線，故外界已不時拎佢哋做比較，有得同主角比，可見馬神絕非池中物。
《智勇新警界》
經過多年喺「警界」嘅努力，馬德鐘喺2003年《智勇新警界》唔使再做散仔，飾演督察馬孝賢，最後仲升咗做高級督察，拍住林保怡、陳浩民做男配角，此劇最高收視更高達41點，認真可喜可賀。
《搜下留情》
事隔7年，馬德鐘重返「警隊」，今次喺2010年《搜下留情》飾演警長吳仲明，雖然都係做警察，但角色上就有重大突破，就係做臥底，以高威明身份進混入涼茶鋪查案，馬神更憑該劇獲TVB頒獎禮最佳男主角提名。
《飛虎》 《飛虎II》
多得做警察，令馬德鐘不斷獲男主角提名，於2012年《飛虎》與2014年《飛虎II》飾演高級督察展瀚韜，試問以馬神嘅健碩Body做飛虎，邊個夠你玩呀？結局呢兩套劇都獲提名最佳男主角，只係最終都食白果，與視帝擦身而過。
《烈火雄心》
而除了做警察，馬神都做過其他紀律部隊，如1998年《烈火雄心》中，馬神便飾演消防員發記王駿發，原本是正直的消防員，後來卻因為要替兄長報仇而投靠台灣黑幫龍頭，由正入邪，可算是考牌之作。
《跳躍生命線》
馬德鐘在2018年《跳躍生命線》飾演護員麥在田，以專業判斷及多年經驗減輕受傷市民的恐慌，成熟面對突發情況，最終升職做救護主任，由於套劇贏盡口碑，所以唔少人都估計馬德鐘是今年視帝大熱門。
做專業人士一樣掂
其實馬神唔止做紀律部隊勁，就算做其他專業人士一樣令人下深刻印象，唔知你又最buy馬神邊個look？
《衝上雲霄》
馬德鐘終於脫離紀律部隊，在2003年《衝上雲霄》飾演飛機師凌雲志Vincent，與Belle（陳慧珊飾演）有感情線。馬神更憑機司一角上位變一線小生，兼奪得壹電視大獎十大電視藝人第二位及至酷至型藝人大獎。由於佢無份拍《衝上雲霄II》，更搞到TVB接到唔少觀眾投訴。
《情迷黑森林》
馬德鐘在2005年《情迷黑森林》成為另一種專業人士──蛋糕店蛋糕總廚。劇中他天生低心率，雙手異常低溫人，是個整甜品的天才，造出來的蛋糕特別好吃，成功助他吸納更多粉絲。