上樓食霸氣黑松露龍蝦麵

煮個麵畀你，未必一定是是但但。好像在銅鑼灣新開的一間上樓麵店，自家熬製雞湯、魚湯底，30多款車仔餸，簡單如溏心蛋、矜貴如花膠都有，最吸引非黑松露龍蝦麵，每碗盛惠$68，必試！

銅鑼灣食廈新開麵店「小玲瓏」，店主Rex希望做出精細麵食，一如名字有小巧玲瓏之意，由經驗豐富的施師傅，設計出多款麵食，及可自由配搭的車仔麵。一改平民麵食的粗疏感覺，湯底自家熬製，包括黑蒜黃金雞湯、白雪公主湯（鮮魚）及傳統濃湯。餸料選擇30多款，每款由$5-$16；並以小碟盛載，避免餸料跟湯底混合，保持各自原味。

最吸睛的要數$68一碗黑松露龍蝦麵，賣大包之作，每日限定20碗，賣得平，亦沒將貨就價。半隻龍蝦上碗，造型霸氣，即叫即煎，先以蒜蓉牛油煎香，再燴以上湯及蝦頭醬，既鮮且香，還有意大利黑松露醬點綴，幽香撲鼻。此麵的魚湯底也是亮點，是師傅每天買來新鮮雜海魚，先煎香再煲湯，一熬6小時，入口鮮甜無比，甚有住家feel。

18種香料川味肉醬

川味麵食也是推介，像秘製肉醬豚肉撈擔仔麵及口水雞撈烏冬。擔仔麵的肉醬看來像台式肉燥，其實有自家風味，將新鮮半肥瘦免治豬肉以四川郫縣豆瓣醬、18種香料及花生醬烹調，香辣少甜，質感較乾身，跟滑溜的擔仔麵同吃，一絕。自家調的口水雞汁，重香不重辣，令雞件入口香麻，帶點刺激，拌上煙韌稻庭烏冬，好快清碗。

小玲瓏手工湯車仔麵info

地址︰銅鑼灣記利佐治街1號金百利廣場7樓R4室

電話︰3580 1551

營業時間︰12nn-11pm

平均消費︰$60

編輯︰魏雋

美術︰顏玉玲