蟻俠明年登陸迪士尼 港人8折買「奇妙處處通」

唔經唔覺米奇老鼠已90歲，迪士尼都有一連串新活動同設施推出，真係喜上加喜！黛安知道，迪士尼明年3月將加入全新Marvel主題互動遊樂設施。另外，迪士尼即日起至明年1月15日，仲為香港居民提供優惠，購買4張或以上「奇妙處處通」有8折優惠，真係好抵玩！

公關姊妹同黛安講，迪士尼會喺下年3月推出全新Marvel主題互動遊樂設施「蟻俠與黃蜂女︰擊戰特攻！」。呢個全新嘅設施會設喺明日世界嘅Marvel世界內，到時可以喺「史達科技展」神盾局（S.H.I.E.L.D.）科技館度坐上「神盾局」野戰車，同蟻俠仲有黃蜂女並肩打壞人，到時電影《蟻俠2︰黃蜂女現身》中兩位主角保羅活特同埋伊雲祖蓮莉莉仲會喺呢項互動遊樂設施度亮相，Marvel迷千祈唔好錯過！

迪士尼城堡區仲會喺下年暑假推出全新「魔法化粧廳」，小朋友可以喺迪士尼城堡區着住豪華版公主禮服套裝，化身魅力非凡嘅小公主。另由下月7日起至明年2月，迪士尼仲會舉行「米奇90派對盛事」，喺慶典期間，迪士尼仲會推出全新以米奇與好友為主題嘅紀念版樂園門票，喺11月18日米奇生日當天起，入場人士仲可獨家得到特別版生日貼紙！

最開心係，由即日起至下年1月15日，本港居民購買4張或以上「奇妙處處通」就有8折優惠，多項「奇妙處處通」會員專享活動亦會喺下年陸續推出，包括全新嘅迪士尼奇妙音樂節目。

另外，以《海底奇兵》為主題嘅兒童天地「海底奇兵小天地」會喺下年暑假喺迪士尼探索家度假酒店開幕，下年仲會推出超過500款全新嘅主題美食同餐飲，真係由而家玩都出年都得呀！