中電辦「創新節能企業大獎」 中大和聲書院太陽能發電奪獎

黛安平時都好關注環保，希望可以為應對全球氣候變化出一分力。黛安知道，中華電力舉辦咗首屆「創新節能企業大獎」頒獎禮，表揚工商界喺創新節能嘅出色表現。當中獲「再生能源卓越大獎」嘅香港中文大學和聲書院喺宿舍天台安裝高效能太陽能板，自2017年起每年生產近3.3萬度電，相等於120個宿位一個學年嘅用電量。

中電公關姊妹同黛安講，該書院又以宿舍其中一間房作試點，應用市面新式人工智能冷氣控制裝置，智能系統可根據用家嘅體感舒適度，同房間唔同時段嘅環境指標，調節最理想冷氣運行方案，減少不必要能源消耗。

中電企業客戶服務署理總監盧志華博士話，和聲書院制定咗慳電獎勵計劃，學生用電量若超出宿舍原定配額，就要自己交額外電費，相反就有餘額回贈。啱啱過去2年，宿舍房間用電量減少逾2成。中電客戶及業務拓展部高級總監劉麗娜又話，中電幫宿舍活動室嘅其中一扇窗安裝咗智能調光膜，隔離部分陽光，咁就可以用少啲冷氣機，果然非常環保！