《U Magazine》精明旅遊嘉年華 $100拍賣東京來回機票

想搵旅遊新意思，黛安梗係睇實《U Magazine》。佢哋主辦嘅「精明旅遊嘉年華」，每年優惠都叫好叫座，今年當然都唔例外。公關姊妹率先同黛安報料，今屆日本東北觀光推進機構，同馬來西亞旅遊促進局都會加入，參加攤位小活動，有機會攞到東北小土產，或者飛馬拉免費機票，仲首設試着浴衣體驗。現場仲有多間航空公司同郵輪品牌搶先開賣嘅限定優惠，部分團費即場報名可減$4,000。

想第一時間掌握最新旅遊優惠，今日（19日）起一連3日記住去奧海城2期地下主題中庭參加嘉年華啦！星期六、日下午仲會將多款旅遊產品以低至$10底價拍賣，包括澳門來回船飛等。黛安就睇中以$100底價開拍嘅東京來回機票，仲可做埋慈善，收益會捐晒畀「Make-A-Wish願望成真基金」，好有意義。