《晴報》主辦 Banking & Finance Awards 2018 表揚銀行創新服務

大數據年代，香港各大銀行加快革新求變，仲愈變愈好！黛安上星期五就出席咗《晴報》連續第3年主辦嘅「Banking & Finance Awards 2018」，表揚香港各大銀行和金融機構積極創新，為市民提供與時並進嘅服務。

頒獎典禮喺香港JW萬豪酒店舉行，雲集各大金融界精英，嘉賓仲好有分量，包括商務及經濟發展局副局長陳百里博士、香港城市大學特約教授曾淵滄博士、香港經濟日報集團董事總經理兼執行董事及《香港經濟日報》社長麥華章、《香港經濟日報》副社長兼研究部主管石鏡泉（石Sir）及《香港經濟日報》執行總編輯區達明等，有110人參與，陣容鼎盛。

麥社長致辭話，近年各大銀行和金融機構都加快創新，抓緊機遇，所推出嘅服務都各有特色。獎項9月開始遴選，《晴報》亦專訪咗各大主要銀行和金融機構嘅心得同經驗，出版共16期嘅「創富．香港突圍之路」系列。選舉共設四大獎項類別，除專業評審評分，亦設公眾網上投票，公信力十足。專業評審包括立法會議員邵家輝、香港會計師公會會長唐業銓、香港銀行學會行政總裁梁嘉麗、《晴報》總編輯潘少權等等，一共10人。

典禮上共頒發咗27個獎項，其中中國銀行、恒生銀行、香港滙豐和渣打銀行，奪得傑出財富管理銀行大獎，而大新銀行亦都奪得傑出高端理財服務大獎，可喜可賀！

典禮尾聲，石Sir就同大家分享投資策略；佢相信最令人關心嘅中美貿易戰，會隨着美國中期選舉完結，好快會落幕；而且美國廠商短期內唔會撤出中國，恒指估計會喺24500見底，仲叫大家喺呢兩年多賺小小！