黛安
黛安

海港城「Sunset Cheers」品味派對 邊賞靚景邊歎美酒佳餚

發佈時間: 2018/10/22

海港城「Sunset Cheers」品味派對 邊賞靚景邊歎美酒佳餚

一年一度嘅「美酒佳餚巡禮」即將喺今個星期四(25日)開始,相信大家都好期待!黛安知道,海港城為咗響應活動,即日起至下月4日,逢星期五至日舉行一個名為「Sunset Cheers」嘅品味派對,精選多款來自世界各地嘅高級海鮮罐頭,由蟶子、海膽、吞拿魚柳樣樣齊。仲會有一系列主題雞尾酒等,畀大家邊欣賞維多利亞港嘅黃昏美景,邊陶醉於美酒佳餚之中,人生一大樂事!

黛安知道,今次呢個「Sunset Cheers」活動,分為100蚊同150蚊2款品味通行證,即場買完就可憑證換領1罐指定特色罐頭,以及3杯飲品,再喺海港城觀景台「海運觀點」享受!而當中嘅罐頭有來自西班牙嘅蟶子、青口、八爪魚;日本嘅海膽、蠔、帶子,及葡萄牙嘅吞拿魚柳同丹麥嘅鱈魚魚肝等,真係聽見都流晒口水!飲品方面,除咗多款白酒同日本酒外,仲有一系列「Sunset」主題雞尾酒。

派對仲會首次加入互動元素,喺場內設置「Wine Sensory」品酒站,大家可運用自己靈敏嘅嗅覺分辨各種美酒,絕對係有嘢食,又有嘢玩!有興趣去海港城享受不一樣嘅美酒佳餚,就記住唔好錯過喇!

撰文: 黛安 消息特靈八卦公關
欄名: 八卦名利場