林鄭現身維港泳 為基層「小飛魚」打氣

噚日係「新世界維港泳2018」嘅大日子，黛安都有到場同逾3,300位健兒打氣，同場仲見到特首林鄭月娥！黛安知道，林鄭同其中3位嚟自基層家庭嘅「小飛魚」交流，了解佢哋游水受訓嘅經驗同埋感受。3位「小飛魚」都參加咗「新世界飛魚計劃」資助學游水，其中12歲嘅陳靖就係今屆維港泳年紀最細嘅參加者，佢同哥哥陳喆一齊參賽，另一位就係13歲嘅女將張心弦。

新世界發展執行副主席兼總經理鄭志剛就話，「新世界飛魚計劃」係為基層小朋友提供支援，培育佢哋對游泳嘅興趣，為香港體壇發掘更多新星。呢個計劃由新世界發展同香港業餘游泳總會喺2012年合辦，招募年齡介乎7至12歲嘅基層小朋友，提供7年免費游泳訓練，而家約有300個學員受訓，其中一位受訓5年嘅陳鎡樵仲喺今屆維港泳競賽組度勇奪季軍，認真叻仔！