「社工故事」分享會 助基層發展才能

香港職業發展服務處（EDS）噚日舉行咗「社工故事」短片首播暨致謝午宴，黛安都有出席，透過播出3條短片畀大眾了解佢哋嘅服務，短片主角分別係一班學障青年、長者同埋南亞裔居民，就算唔同背景嘅人都可以發揮小宇宙。

EDS主席羅君美話，EDS唔止幫弱勢社群搵工，仲為佢哋提供情緒支援，又多謝一班僱主肯聘用佢哋，等佢哋可以發揮專長。EDS高級輔導主任黎雅儀（Becky）就同18歲南亞裔小美女Sabira，喺其中一條短片介紹「職業在線就業支援計劃」，呢個計劃主要係支援小數族裔搵工同做培訓，Becky就話，少數族裔好多時礙於語言問題好難搵工，但佢哋其實好勤力，部分人轉數仲好快！講得一口流利廣東話嘅Sabira就話，礙於種族唔同，好多時會被人誤以為係懶惰一群，其實小數族裔都好努力充實自己。

另外兩條片分別係介紹EDS喺2016年成立嘅「曲奇夢工場」同埋「長者就業支援計劃」，主要講學障青年同長者都可以做到好多嘢，黛安睇完都覺得充滿正能量！