倫敦傳統聖誕燈飾 登陸利東街

距離聖誕節仲有兩個月，又係睇聖誕燈飾嘅時候喇！黛安收到風，灣仔利東街今年會大搞新意思，將英國攝政街（Regent Street）享譽國際嘅華麗企劃「The Spirit of Christmas」帶嚟香港，下個月16號起就有得睇喇！

黛安知道，攝政街係倫敦最具標誌性嘅購物大道，亦係當地市中心最早開始引入節日燈飾裝點嘅主要大道，已經有60幾年歷史！不過想睇又唔使飛到英國咁遠，因為佢哋嘅「The Spirit of Christmas」今年將首次走出英國，破天荒同香港「利東街」合作！由下個月16號開始，「利東街」將會沿路展示攝政街其中5個具代表性嘅燈飾，用原汁原味嘅英倫風格同大家共度佳節，之後亦會有連串精采嘅聖誕巡遊同各種主題活動，記住唔好錯過啊！