黃翊的故事，絕對稱得上獅子山下的故事，1986年出道、當時黃翊被捧為「張國榮接班人」，憑一曲《最愛的妳》爆紅，但因與黃寶欣拍拖而遭公司雪藏，令事業陷入谷底，為維持生計只好退出娛樂圈，試過於屯門賣衫，其後於2006年與家姐在大埔熟食中心開大牌檔，成功殺出一條血路，正當以為一切回歸平淡之際，去年黃翊獲邀參與TVB節目《流行經典50強》，再憑《最愛的妳》勾起大家的集體回憶，強勢回歸樂壇。
經過一年努力，黃翊於昨晚終於圓夢舉行個人演唱會，更獲李克勤、黃寶欣擔任嘉賓，但就未見事先張揚會來捧場的黃太陳存正，而且以靚聲見稱的黃翊，竟有少少聲沙，明顯不在最佳狀態，原來患有腎病、急需換腎的黃太，在開騷前突然昏迷入院，嚇到黃翊不知怎算：「太太喺10月9號喺屋企昏迷，我發現佢嗰陣成床都係血，即刻叫救護車送咗佢入深切治療部，原來佢昏迷時抽筋咬到條脷，所以流咗咁多血。當時有朋友問我會唔會取消演唱會，但我唔想捨棄3000個歌迷，所以繼續做演唱會，同時盡量抽多啲時間陪太太」
由於一邊要到醫院探望太太，一邊要綵排演唱會，令黃翊身心都承受沉重壓力，幸而昏迷9日後，在開騷前幾日黃太終於甦醒：「起初醒番佢好瘦，完全無氣無力，但依家已經可以同我講電話，康復進度十分理想。」
黃太多災多難曾患情緒病
其實又難怪黃翊咁擔心老婆，事關黃太的病歷史堪稱多災多難！1996年黃翊與黃寶欣分手後，很快便與陳存正拍拖，兩人更於2005年誕下寶貝仔黃睿，一心諗住一家三口過幸福生活，誰知黃太卻患上情緒病，黃翊憶述：「嗰陣太太睡眠質素好差，仲成日頭暈，睇過好多醫生都搵唔到乜嘢原因，後來有朋友話太太嘅情況同佢家姐好相似，於是建議我哋睇精神科醫生，結果證實患上情緒病，每日要食成30粒藥。」
黃翊更懷疑太太可能食得太多西藥，導致患上腎病：「佢每次發病會頭暈、水腫、小便有蛋白尿同血尿，甚至影響視力，好擔心會變盲，佢入私家醫院住10日已經要20萬。」黃翊希望黃太能早日接受換腎手術，不用再受病魔煎熬。