麥當勞×謝霆鋒 推出「鋒味」港式漢堡

藝人謝霆鋒近年愛上下廚，近日仲破天荒同麥當勞合作，推出「麥當勞×鋒味」The Signature Collection，黛安已經急不及待，今日即刻排隊買嚟食啦！

聽公關姊妹講，今次嘅Collection係由霆鋒親自構思。霆鋒噚日就大談創作靈感，佢話，原來靈感源於片場拍戲時經常食嘅飯盒，「平時拍戲忙，好少有機會返屋企吃飯，所以對我來講，片場嘅肉醬煎蛋飯，同細個經常食到嘅洋蔥豬扒飯，就係我最熟悉同窩心嘅味道。」

霆鋒仲即場示範，先煎香嚟自澳洲同烏拉圭嘅130克安格斯牛肉，配上金黃微焦嘅煎蛋同惹味濃郁嘅秘製肉醬，濃郁嘅芝士肉醬香氣，令人食指大動！霆鋒話，佢最鍾意肉醬嘅香濃味，今次為咗令滋味加倍，特意加入牛味濃郁嘅安格斯牛肉，「我相信大家一定會鍾意呢個漢堡！」

「鋒味安格斯•煎蛋肉醬飽」今起正式推出，而「鋒味洋蔥吉列豬扒飽」就會喺下月20號登場，用吉列豬扒取代普通豬扒，配合炸洋蔥碎同香炒洋蔥雙重口感，加上微溶芝士、酸甜開胃嘅沙律醬，聽到都想食啊！

姊妹話，「鋒味」系列仲有「鋒味港式燒味風味調味粉」、「鋒味避風塘炒蟹味調味粉」、「鋒味曲奇奶茶麥旋風」、「鋒味橙汁雜飲」同「鋒味菠蘿冰」。除咗「鋒味菠蘿冰」同「鋒味避風塘炒蟹味調味粉」會喺下月20號先開始供應，其他新產品今日就有得買啦！