港島西「藝里坊ARTLANE」 精美壁畫成文青打卡熱點

香港有新「打卡」熱點喇！黛安噚日去咗西營盤嘅忠正街、奇靈里同石棧里參觀由恒基推出嘅港島西SOHO「藝里坊ARTLANE」壁畫藝術之旅。聽公關姊妹講，呢個壁畫藝術之旅以SOHO區嘅「藝術及音樂」做主題，有9位嚟自本地同國際知名藝術家將區內多幢大廈外牆，翻新成壁畫藝術，令西營盤依家有13幅外牆塗上9幅嘅壁畫作品畀大家「打卡」。

而呢9個壁畫藝術品，分別叫「都市森林」、「Transformation」、「經典荷里活傳奇人物」、「壁畫隧道」、「澆花中的小女孩」、「彩虹樓梯」、「動物小鎮」、「音樂藝術之樂」同「維也納音樂小鎮」。9幅作品令整個社區都感受到音樂同藝術氣息。

Zue Chan係「澆花中的小女孩」同「維也納音樂小鎮」嘅藝術家。前者作品樓高兩層，上層講一個女孩喺度淋花，下層係色彩繽紛嘅花園，佢話︰「呢幅畫附近有個公園，希望透過畫成為呢個公園嘅延伸。」Zue又話幅壁畫未畫之前有好多水管，凹凹凸凸，令人睇得唔舒服，畫完之後感覺舒服好多。