一講起美魔女，你會諗起劉嘉玲？關之琳？抑或羅霖？雖然佢哋係keep得唔錯，但喺被譽為「最美麗港姐」朱玲玲面前，佢哋始終差咗啲啲，上個月正式登六嘅朱玲玲，最近為三位十月港姐壽星好友王愛倫（52歲）、陳法蓉（50歲）與岑杏賢（30歲）慶祝生日，同場還有曹敏莉（36歲）與葉倩文（57歲），陳法蓉更於微博開心分享喜悅，照片一出於網上惹來唔少迴響，事關朱玲玲的不老顏值實在太震撼，拍埋後輩王愛倫與葉倩文身邊，明顯後生一截，就算同只係得36歲嘅曹敏莉比，亦唔輸蝕，難怪令唔少網民都對朱玲玲的不老秘密很好奇：「到底佢係用乜嘢牌子嘅護膚品？點可能60歲都keep到咁後生？」又有網友拎十年前朱玲玲嘅相比，結果仲震撼：「睇返十年前嘅相，朱玲玲個樣真係無乜點變，佢嘅時間好似停咗咁。」
成日聽人講世上無醜女人，只有懶女人，若然係真，朱玲玲肯定勤力到爆，不過實情錯晒，講到保養心得，佢竟然話自己好曳：「其實我無特別保養方法，只係著重平衡，凡事都唔好太過份，不過我都好曳，唔係食得好清淡，因為由細到大習慣咗。」聽完朱玲玲咁講，大家係咪覺得個天好唔公平呢？