近期《跳躍生命線》熱爆全城，收視高達近三十點，連救護員都大讚劇集成功將佢哋出動嗰陣救傷扶危、爭分奪秒嘅情況呈現出嚟；而且劇集影響力好大，佢哋仲聽到身邊唔少小朋友夢想職業都變咗做救護員，連帶四位飾演救護員嘅演員何廣沛、郭子豪、張彥博、羅天宇都爆紅！睇見佢哋咁高人氣，日日都有人討論，TVB當然唔會放棄呢個黃金機會，食住個勢扮F4，喺網上惡搞《流星花園》經典MV，結果條惡搞片一出即大受歡迎，唔使一日就有超過三千個share，成十八萬人睇過，認真巴閉。
高質惡搞流星花園MV 堅神似正過搞笑泰版
佢哋今次惡搞嘅台劇《流星花園》喺2001年播出，係唔少人嘅童年回憶，講四個大家族富二代喺學校嘅生活同愛情故事。當中周渝民飾演花澤類、朱孝天飾演西門、言承旭飾演道明寺、吳建豪飾演美作，由於有型又演得，所以F4馬上紅遍全亞洲。《流星花園》唔單止成為偶像劇鼻祖，由於佢哋角色實在太經典，多年嚟都吸引唔少藝人惡搞，仲出現泰國災難版，當年亦成為一時笑話，不過講到神似喇喎，似乎都係《跳躍生命線》勁啲，起碼個樣都算靚仔啲，唔會一味搞笑嘔白泡。
因為呢條片不論氣質、唱功、特效都屬於高汁之作，包括特效、鏡頭角度、動作都好完美咁翻炒《流星花園》個MV，不過TVB又點會幫人宣傳呢？所以背景音樂就由《流星雨》改做《跳躍生命線》主題曲《無畏的肩膊》，仲叫埋佢地唱。結果唱到完全唔啱beat又走走哋音，睇到網民忍唔住笑到眼水都標出嚟。TVB見到大家反應咁好都即刻上水回覆，叫啲網民睇還睇，如果唔舒服就要call救護，馬神一定幫到佢哋，咁識幫劇集賣廣告，呢個公關幾識do。
郭子豪扮美作最頂癮 網民大叫想掟爆手機
拍完呢條惡搞片，佢地四個竟然自稱做2018新人組合──跳躍F4！究竟那來的自信呢？睇返個MV，何廣沛扮仔仔還可以；張彥博扮西門靚女到網民都誤會咗梁詠琪有份客串；羅天宇扮道明寺，竟然搵到件衫一模一樣；最正竟然係郭子豪，佢除咗100%還原返美作個負離子頭，仲七情上面咁演繹返個神粹，矇住雙眼係咁搖擺個頭，唔講真係以為佢係吳建豪，簡直係最佳MV男主角。
而數到何廣沛、郭子豪、張彥博同羅天宇四個當中，最獲網民like爆就係扮美作嘅郭子豪，由於佢個造型同動作都十足中幅射咁款，搞到有網民睇完大叫想掟爆手機：「因為呢條片，我笑到先後把Galaxy Note 9, LG V20, Galaxy Note Edge, 小米2S及Nokia N8(S60)先後扔爛，而家焗用Nokia 5730打字咋，陰功」，咁講真郭子豪又幾有喜劇細胞嘅，絕對有潛質向喜劇演員進發呀！