相信不少人都會在畢業、結婚、懷孕等特別時刻，找專業攝影師拍照留念。那麼，除了跟親朋好友外，大家又是否願意花錢為寵物影返輯靚相？晴報今次特地找來全職寵物攝影師小明，分享寵物攝影的趣事、難忘經歷及當中的困難，並即場示範拍攝寵物的技巧。小明指出，寵物除了可以成為主角外，也可作為家人之間溝通的橋樑。
入行攝影約11年的小明，於4年前轉做寵物攝影，成立「Bambiland」；他兩年前完成寵物犬行為及訓練課程，故除了是攝影師外，同時是一名認證的寵物犬訓練師。對於為何當初會轉做寵物攝影，小明表示，因為他留意到市場上，有好多人會帶小朋友、家人、懷孕媽媽去影相，但專為寵物影相的似乎未有，多數是「搭單」，「其實貓狗都可以係主角，都可以係一個出去影相嘅原因，所以之後都開咗呢個地方（studio）做呢樣嘢。」
這4年間，他在工作中都有不少難忘經歷，例如曾替患上重病、臨終的狗狗拍照，「最近一單影過都幾深刻，就係嗰隻狗仔原本約咗朝頭早會上嚟studio影相，但因為佢個狀態忽然間好差，跟住我就問洗唔洗我夜晚上門幫你哋影吓相。結果嗰晚影完相之後第二日，隻狗仔已經過咗身。」
小明指出，他已遇到過幾次同類事件，「其實好多時，講緊幾個鐘前仲同佢玩緊、摸緊佢、食緊嘢、好開心，但轉過頭又同你講，佢已經走咗」，令他難以接受。除了難過的事外，他也曾遇到溫馨故事。他表示，曾有家庭，家中男士均不愛拍照，「甚至成世人都未試過同屋企人影過一張相」；但自從養了狗狗後，「因為隻狗，同埋成家人一齊上嚟影到一啲都幾sweet、幾warm嘅合照。影完之後佢哋年年都會keep住嚟，好多都係。狗仔變咗一個大家溝通嘅橋樑。」
創業甚艱難，小明也經歷過不快事件。Bambiland剛開張時一度不收訂金，「大家都係養狗，講個信字」；豈料，竟然有不少人「甩底」，「問佢嚟唔嚟，連覆都唔覆」。發生過幾次同類事件後感到失望，他們只好改為收取訂金，「so far最後呢班人都唔係我客人，所以我啲客人全部都好好！」
至於現時面對的困難，他表示，是時間不足及體力跟不上，暫時未找到助手可以幫手，「一嚟唔太多人入行，二嚟如果要求要一個人係本身熟寵物嘅，然之後又要對影相有啲認識嘅，其實就更加難……隨緣啦。」對於未來願景，他希望各位主人可以趁毛孩健康時，帶牠們去影靚相，「唔一定搵我，盡量大家都留影，因為好多時候到（寵物）狀態差嗰時再影，佢無論個心態同個樣都會變得差咗。」