黛安
黛安

中華廚藝學院 重現紅樓夜宴

發佈時間: 2018/11/05

中華廚藝學院 重現紅樓夜宴

中國唔少文學作品都會提及美食,但大家有無諗過小說都可成真?黛安知道,繼去年舉辦過「射鵰英雄宴」後,中華廚藝學院(CCI)最近再次將中國文學與中華廚藝結合,9月搞咗個「紅樓夜宴」,重現中國四大名著之一《紅樓夢》曾描繪過嘅14款佳餚,絕對好睇又好食!

為咗呈現《紅樓夢》大觀園中嘅菜式,由CCI導師組成嘅10人「知味承傳」示範團隊,早前仲用咗8個月研究,將書中出現過嘅200道菜式中,精選14款出嚟,成為今次「紅樓夜宴」嘅9大道菜,好似其中一道「太君讌席大觀園」就包羅咗小說曾出現嘅鵝掌鴨信、雞脯茄鮝、同林黛玉所嘗嘅家鄉菜雪耳燴鴿蛋等,每道菜名都取自《紅樓夢》中大觀園嘅亭台樓閣,好似瀟湘館、梨香院咁,好有心思!

CCI總教導員陳啟漢同黛安分享,話小說同文學作品某程度係反映小說當代嘅起居飲食,所以根據文學作品做菜都算係一種承傳工作。但由於現今嘅煮食環境、器具等,同小說描述嘅年代唔同,所以做起嚟真係一啲都唔易㗎,黛安都覺得真心佩服。

撰文: 黛安 消息特靈八卦公關
欄名: 八卦名利場