話之你係男神定女神，始終敵不過歲月洗禮，最近吳彥祖就突然於社交網站上載舊照兼留言話：「在我父親的錢包裡發現了這照片。這時候我一定是16歲左右？我希望我能把所有的頭髮都拿回來。」完全道出了男人最痛，雖然吳彥祖今年只是44歲，個樣同後生個陣真係無太大分別，唯獨頭髮愈來愈少，明顯出現髮線向後移，難怪Daniel咁傷感啦！
不過近日就有網民於內地江門野生捕獲吳彥祖，當日嘅佢啲頭髮完全返晒嚟，以一頭長髮登場，頭髮仲去到膊頭咁長，真係幾有聶風feel架，難怪吸引大批途人圍觀！據知，當時吳彥祖是拍攝港產片《限期破案》，對手還有謝霆鋒、蔡卓妍與文詠珊等等。其實自從於2014年拍畢《竊聽風雲3》後，吳彥祖就將重心放到荷里活，拍攝電視劇《荒原》系列、電影《盜墓者羅拉》等等，今次難得回歸港產片，還要跟謝霆鋒交手，絕對令人期待，而相信唔少人都仲記得佢哋19年前合拍嘅《特警新人類》，唔知今次又會擦出幾大火花呢？
而於網上更流出一張《限期破案》的通告，內裡詳細列明拍攝地點與日期等等，當中更有槍戰戲份，如果你係吳彥祖忠粉，不妨試吓去碰碰運氣呀！