透Bra性感上陣 KAY望明年開紅館騷

謝安琪（Kay）、麥浚龍（Juno）、王雙駿（Carl）及陳哲廬（Jerald）前晚於會展舉行拉闊音樂會，人妻Kay全晚非常性感，穿上透視衫的她更大曬黑色內衣。原來Kay已入紙申請明年紅館檔期，希望能在浪漫的冬天開騷。

謝安琪與麥浚龍前晚以新碟中的主角浦銘心及董折為題，全晚以歌曲訴說故事。Kay唱了大熱歌曲如《囍帖街》，又與Juno合唱《羅生門》，二人再合唱一曲《櫻吹雪》向金庸致敬，獲嘉賓俞琤彈ukulele伴奏；音樂會到尾聲時，現場突然播放古天樂的片段，古仔更開金口唱歌，十分驚喜。

完騷後Kay及Juno受訪，產後首次開騷的Kay表示老公張繼聰在後台為她打氣。提到服裝十分性感，她感謝同事在歐洲搜羅靚衫︰「我有畀老公睇過相，佢好滿意。」另外，她又透露正申請明年紅館檔︰「我希望係開自己個人騷。我想喺冬天開騷，因為有種浪漫氣氛。」至於前晚Juno唱《念念不忘》時，突然在台上抽煙，Juno說︰「係表演情節，揸住支煙唱歌都有難度。」至於大會則表示抽煙實為舞台煙火效果，會向場地申報。

古天樂出山開金口

前晚現場播出古天樂的片段，原來是古仔參與Juno和Kay的新碟企劃，Kay飾演女主角浦銘心，古仔則是Kay的第二任丈夫藍定凌，他們更合唱新歌《（一個男人）一個女人和浴室》。原來古仔早前跟Juno合作電影《風林火山》後成為好友，所以今次才答應「出山」唱歌。古仔與Kay均表示今次合作十分有趣，Kay更希望大家一齊登台，古仔聞言即耍手︰「做咩都得，唔好要我唱live，呢首歌歌詞句句唔同，無重複，我揸起支咪已有壓力喇。」

撰文︰Pauline

攝影︰林良明

編輯︰李潔盈

美術︰李明