前幾日《跳躍生命線》播出最後一集，相信一眾劇迷仍然感到難捨難離，不過編審冼翠貞帶來大團圓結局，沒有爛尾，大家總算鬆一口氣。觀眾最開心應該是馬德鐘好人有好報，儘管無常、意外奪去了亡妻李佳芯的生命，但希望與奇蹟令情人張曦雯在拉撒路症候群中甦醒。同時間命運更將張曦雯與馬德鐘連結起來，原來李佳芯骨灰製成的鑽石鏈不是遺失，而是早就由流浪漢張國強交到張曦雯手中，證明馬德鐘、張曦雯是命中注定的一對。除此之外，何廣沛與劉佩玥、陳瀅與羅天宇、張文慈與區瑞偉都有情人終成眷屬！難怪網民紛紛預言《跳躍生命線》在TVB頒獎禮贏得「最佳劇集」大獎。
每集獨白經典重溫 陳瀅個名原來是最大伏筆
《跳躍生命線》有一大特點，就是幾乎每集結尾都會有段角色獨白，這些獨白講述的都是每個人總會經歷到的人生道理，有串連全集的作用，增加劇情完整性，簡單幾句獨白令人再次憶起全集種種，特別又有深意，讓很多觀眾為之動容，現在就帶大家重溫每集的經典獨白，看看你又有幾多體會？另外原來陳瀅劇中的名字更是全劇最大伏筆，當中暗藏重要玄機！想知？繼續看下去會慢慢分析。
第1集：李佳芯
「記得做學生嗰時，老師問嘅每一條問題都會有一個答案。但到人大咗，先知道有時候問問題，對方唔一定會比答案。我們唯有自己去尋求，憑住蛛絲馬跡去猜度、去推斷、去大膽假設，到最後，原來答案就擺喺眼前。但係有啲事，無論你幾聰明、幾努力，你都無辦法知道答案。老公永遠都唔知我最後想問佢啲咩……『係呀，我呢邊個月光好圓好大，你嗰邊係咪都見到滿月呀老公？』……我估唔到嗰次就係我哋最後一次對話，或者有遺憾，呢個就係人生。」
第2集：何廣沛
「啲人成日話，時間會治癒一切傷口，其實係錯。有啲傷口，即使時間過咗幾耐，你都無辦法令佢復原，因為傷口並唔喺自己度，而係喺在乎你嘅人身上。每當我背脊痕嘅時候，我就知有人就會痛，我唯一能夠做嘅，就係話比佢聽，呢件喺火舌中煉成，花紋咁特別嘅衫，喺艷陽下，會閃耀獨有嘅光芒。痛過之後，長出嘅唔單單只係新皮嫩肉，仲有堅強。」
第3集：馬德鐘
「每日我哋都會遇見好多人，每個人嘅出現都有佢嘅意義，有啲會成為戀人知己；有啲成了摯友良朋，佢哋嘅出現係為咗考驗你；為咗扶助你；更多時係為咗帶出最好嘅你……每個相遇都足以影響一生，而喺相遇同相分之間，我哋齊齊上了一課——學識被愛，懂得去愛。」
第5集：馬德鐘
「颱風『花渡』，Fado，係葡萄牙嘅民謠，拉丁文原義係命運。Fado講人接受命運，結局多數都係悲劇嘅多。就好似今晚，命運安排，要我見返撞死阿芯嘅兇手，同十年前一樣，都係喺救護車上面。香港人係善忘，但每次打風，總會有人提到「溫黛」，即使已經過了半個世紀，依然未能忘記，係因為嗰種摧毀實在太深刻。正如今次，又會有人因為颱風「花渡」而記住呢一晚。我哋唔係唔想忘記，而係無法忘記，唔係每一句『對唔住』，都可以有一句原諒嚟結尾。」
第6集：鄭子誠
「有月亮嘅夜晚，星星就會暗淡，要等到雲霧收起月色，星星先可以發光發亮，一切都係相對。人，總係會有一刻，你以為失去所有嘅同時，竟然會係前所未有嘅得著，乜嘢可以捨棄？乜嘢係唔能夠放手？迷惘過後，緊隨嘅會係一顆澄明嘅心；傷痛過後，換嚟嘅會係更堅定嘅人生。當你以為會失去一個人，倒頭嚟竟然會得著一整隊人。望住佢哋，心意一致，目光堅定不移。今晚月色好靚，但就係無法掩蓋……地上星光燦爛。」
第7集：何廣沛
「世事就係咁奇妙，一個浪子回頭，一個嚐過死別，兩個軌迹截然不同嘅人，命運將佢哋連成一線，結為伙伴。緣淺嘅尚且如此，緣深嘅，命運甚至要佢登堂入室，莫名其妙就成為家中嘅一份子。到底眼前人，要喺你生命上留下個咩嘅足跡，係歡欣定傷感？係朋友？定敵人？我唔知，會唔會就只係簡簡單單，好似「一代宗師」所講：「世間上所有嘅相遇，都係久別重逢。」
第8集：何廣沛
「死亡其實唔可怕，因為更可怕嘅係——別人嘅死亡。當你以為事事向好方向行緊時，點會估到，意外就喺轉角。望見日出，捱過日落，我終於體會到無常——就係救護員嘅日常。呢種滋味，日後定會再嚐，我只係希望，苦過後，會有呢一點甜嚟結尾。」
第10集：羅天宇
「意外要嚟，來不及說再見；緣份要走，過去嘅美好變成痛苦嘅回憶；生活艱難，人甘願承受，苦苦掙扎。因為我們對生命仍然有期待，期待有分離就有重逢、有壞事就必然有美好。問題只係，可能要承受九十九次嘅壞，先會有一次嘅好。」
第12集：馬德鐘
「人總會有被欺騙嘅時候，而呃得我哋最多最深嘅，往往係自己。許下承諾，一個意外，先知講嘅係謊言；否認過去，一個動作，就將你出賣；以為恨嘅，原來仲有愛；以為仲愛嘅，到頭來，連恨都係奢求。人係咪要到死嗰時先知咩係生命中最重要？會唔會有一個簡單啲嘅方法？一件舊物？一舊蕃薯？定只係，一個簡簡單單嘅笑容？」
第13集：譚家俊﹙原本設定﹚
「世上最難解嘅結，係心結。為對方選擇留下，點知留下嘅會係一根刺；去放眼世界，望盡天涯，偏偏就望不見至親嘅最後一面；以為等一個人，失望落空時，卻奇蹟地等到另一個明天。心結之所以難解，係因為解結要靠一雙手，一隻屬於自己，而另一隻，往往要依靠他人。」
第14集：馬德鐘
「『休息，係為咗走更遠嘅路』，呢個說法好多人聽過，但真正明白，而又做得到嘅人唔多。如果某時某刻你覺得身心俱疲，無力走下去時，試吓停落嚟，飲杯茶，抖一抖，伸個懶腰，再唔係猜個謎題輕鬆吓又如何？ 「救護員放假」，估香港一個地區名。﹙答案：油麻地﹚」
第15集：馬德鐘
「我一直以為，世事無常，意外難免，人力係薄弱嘅。但今晚我終於領悟到，喺生死有命呢個課題前，救護員唔係孤軍作戰。因為由始至終，都有兩兄弟陪伴左右，一路同行——佢哋就係希望同奇蹟！」
第16集：馬德鐘
「有人話，每個人身邊都有個天使，佢哋會以唔同嘅身份、性別、年齡、樣貌出現喺你生命裡面。有需要時，佢哋就會出現，伸出援手，幫助你渡過難關，重獲新生。有種說法，話天使唔止一個，可以係兩個、三個，可以係許願、守護、扶持、安慰、聆聽，好多好多……所以就算遇到幾惡劣嘅環境、幾困苦嘅時刻、幾崎嶇嘅路上，人從來都唔孤單。或者有人仍然會講，我望唔見，肯定身邊一個天使都無，呢個時候或者你低頭望一望自己，就會知道，原來你已經成為其他人嘅天使。」
第17集：陳瀅
「我哋曾經相信很多事，相信人可以快過風；相信只要回家，就有家人在守候；相信放手，就會擁抱更多；相信無論隔咗幾多年，親情嘅味道都唔會變……而呢一刻，我只要相信你所信嘅，就足夠啦！」
第18集：馬德鐘
「以為很棘手嘅事，一個人一句話就幫你解決；以為全力以赴、勝券在握，陌生人一個決定就讓你失望；以為前路黑暗，心慌忐忑，一個燈泡一點光就令你安定落嚟。是得是失、是晴是雨、是路過、是停駐，從來都唔係我地可以決定。能夠做嘅，就係一天下來，喺休息前，能夠向在乎在意在心中嘅人，說句早抖，講聲goodnight，因為今天已成過去，日子唔會再嚟。」
第25集：鄭子誠
「救護工作，講求刻不容緩嘅救治，默默無聲嘅守護。時日會話你知，風雨過後會見天晴；冬天之後，春暖就花開。傷心會過，怨恨會淡，愛，能夠修補一切。若無相欠，怎會相見；離合聚散，各有定時；生命有限，依然要笑容燦爛。他日回首，你會記得，曾經踏著夕陽，擁抱歡樂；曾經相伴忘形，築起情感；於柴米油鹽裡，活出平凡是福。人海中你唔係孤單一個，會有人默默守候，你有需要時，佢就會出現，在微冷嘅夜，送你一點溫暖。呢個人，可以係我，可以係你，生命，並唔係一條線，而係一個圓。」
陳瀅在劇中的角色名叫滿月，原來是編審冼翠貞特別設計的伏筆，與每一集想帶出的訊息有緊密關連。例如李佳芯第一集出事前抬頭望著滿月，與馬德鐘說的那句：「今晚月色好靚...」；第六集鄭子誠獨白又有提及：「有月亮嘅夜晚，星星就會暗淡，要等到雲霧收起月色，星星先可以發光發亮...」，並出現滿月的特寫鏡頭；大結局何廣沛一家成雙成對，在中秋月圓時開心圓圓；片尾最後一句台詞「生命不是一條線，生命是一個圓」，也是跟滿月互相對應；甚至插曲《但願人長久》的歌詞意思亦是與满月有關。
以上設計都是想告訴觀眾：劇中各種無常、意外就是月缺，希望和奇蹟這兩兄弟就是月圓，不過人有悲歡離合，月有陰晴圓缺，就是命運，就是人生。但是編審也用「但願人長久」來貫穿劇集始終，正好解釋李佳芯在電話中還未來得及說的話，首尾呼應，令觀眾欣賞電視劇之餘，又有空間反思人生的意義，是一套結構力強、正面積極的好劇集。