吳亦凡最近推出的首張個人專輯《Antares》，威到成為國際新聞，事關佢嘅新歌砌低天后Lady gaga同Ariana Grande，雄霸美國iTunes榜三甲，本來係開心事，但弊在爆出造假風波，吳亦凡被指以機械人程式不斷刷榜，才能成就驚人成績，其後iTunes更將吳亦凡嘅歌曲踢出榜單，清除晒所有數據，結果變成醜出國際。雖然鬧出連串是非，不過吳亦凡顯然未驚過，更霸氣回應：「我的歌迷是真實的人，絕不是所謂機器人，對於這些言論，我有些無奈，只是因為他們之前沒見過華人音樂人登頂，但我還是會保持謙虛低調，心懷感恩，一如既往。」
紐約舉行慶功會
吳亦凡真係講得出做得到架！近日佢就喺美國紐約宣傳新碟兼舉行慶功會，答謝大家支持，場地可容納230人，大會更準備蛋糕為吳亦凡慶祝28歲生日，而現場所見，吳亦凡心情興奮滿場飛，又即席獻唱四首新歌，適逢當時紐約正在落雨，當唱到《November Rain》時，吳亦凡感觸道：「我小時候在廣州，這個季節比較多雨，但家人不常在身邊，感覺就非常的悲傷，所以這首歌帶給我很多兒時回憶。」而講到今次專輯，吳亦凡更充滿自信：「我覺得是非常完整，完全能夠代表吳亦凡這個人。」面對咁多流言是非都處變不驚，無論你覺得吳亦凡啲歌好唔好聽都好，最起碼佢嘅EQ真係好高！又或者真係面皮好厚！