最近由鄭伊健一班古惑佬主演的電影《黃金兄弟》，成功勾起大家唔少那些年嘅《古惑仔》回憶，套戲唔止喺內地勁收三億票房，近日仲喺南韓舉行嘅「第2屆中韓國際電影節」成功揚威，當中鄭伊健奪得「最受歡迎男人氣明星獎」、錢嘉樂獲頒「最佳動作導演獎」，而音樂總監陳光榮就奪得「OST獎」，伊健仲透露原來早喺十年前，已成為當地手機品牌的代言人，難怪佢一現身紅地氈，即時掀起哄動，同時亦令唔少網民好奇，事關大家都知黎明喺韓國好紅，但估唔伊健喺當地都有一定知名度，仲有唔少90、00後網民當知道伊健出年2月再踏紅館開騷，都顯得有啲驚訝：「我知佢做過陳浩南、聶風，同唱過歌咋，乜佢喺90年代好紅咩？」、「佢係我見過留長頭髮最型嘅男人」、「90年代四大天王玩晒架麻，咁佢當年係咪紅過四大天王先？」相關留言一出，即時掀起唔少討論，有人質疑伊健未夠班，亦有人話當年係佢自毀長城，否則真係有可能成為第五天王！
「奪麵雙琪」損人氣
跟四大天王的劉德華、黎明與郭富城一樣，伊健於90年代同樣主力歌影雙棲，而且擅長飾演由漫畫改編的人物，不論是《風雲》聶風抑或《中華英雄》華英雄，同樣令人留下深刻印象，不過數到最強代表作，定非《古惑仔》系列中的陳浩南莫屬，當中女友細細粒黎姿慘死的一幕，至今依然是不少人心中經典；至於唱歌方面，無論大家覺得伊健的歌藝如何，相信總聽過《甘心替代你》、《直至消失天與地》等大熱作，絕對是當時的唱K必選，論當年聲勢，伊健絕不遜四大天王。
可惜就在事業如日中天之際，1999年發生的「奪麵雙琪」，幾乎令他一鋪清袋，事源當時伊健雖已與邵美琪分手，結束七年情，並戀上梁詠琪，但他未有向外界宣布消息，結果梁詠琪到伊健當時的西貢屋企慶祝生日時，全港傳媒都離奇收到呢個驚人消息，GiGi更以勝利者姿態離開伊健屋企，令男方背上負心男罪名，即時被公司雪藏，為其追趕四大天王的神話劃上句號。