【聲明】港生活網站並無進行電話推廣活動

海洋公園聖誕樹齊放閃 麥兜麥太登台表演

發佈時間: 2018/11/14

話咁快又到咗11月中,下個月就係黛安最期待嘅聖誕節啦!「海洋公園聖誕全城HO HO HO」會喺下個月15日至明年1月1日期間舉行,海洋公園更首次同香港原創卡通麥兜合作,麥兜、麥太首度登上怡慶坊舞台,上演全港首個麥兜音樂劇場「麥兜‧出走的魚蛋」,同時園內仲會設一棵高達40呎聖誕樹LED熒幕,畀情侶上載甜蜜合照放閃!

海洋公園公關姊妹同黛安講,「麥兜‧出走的魚蛋」音樂劇場除咗有麥兜會「親身上陣」傾力演出外,仲有藝人吳君如鬼馬聲演「麥太」一角,一幕幕幽默又感人嘅情節,肯定為冬日聖誕添上暖意。麥兜亦會跳出劇場,同麥嘜喺園內同遊人合照留念。

情侶仲可以利用海洋公園內高40呎嘅聖誕樹「放閃」,只要喺Instagram上載與摯愛嘅合照同加上指定hashtag,合照就可展現喺聖誕樹上嘅LED熒幕,環繞聖誕樹由下而上全方位閃耀。

海洋公園仲會喺今個月同12月推出多項優惠,如本月尾前一次過買3張或以上海洋公園智紛全年證或禮券,即可享65折優惠;銀聯用戶可憑出示有首兩個數字為62嘅信用卡或借記卡/扣帳卡Debit Card,6折買日間入場門票,黛安都要約定姊妹去感受下浪漫聖誕氣氛。

撰文: 黛安 消息特靈八卦公關
欄名: 八卦名利場