翠如爆森美愛在片場唱歌

森美首次擔任男一的劇集《過街英雄》早前已煞科，前晚森美與女主角黃翠如拉隊到佐敦食火鍋慶祝。翠如踢爆森美每日開工都相當好唱口，而森美就坦承拍劇拍上癮。

翠如表示︰「今日開始聽唔到森美唱歌喇！」森美叫她返屋企搵本身也是歌手的蕭正楠唱給她聽，他又笑言，開工時唱歌純粹自娛，不知可有嚇倒人，「都有人點唱，不過我唱陳奕迅都畀人嫌舊，嗰啲90後啦，激死！」翠如提議他明年再返TVB拍劇，森美聞言即笑謂︰「有嘅話下個月都返呀！」

由於森美首次擔正，他承認拍上癮，就算應付動作場面受傷也無所謂，他笑說︰「每次拍完難度高嘅鏡頭，成個錄影廠台前幕後就會拍手，我都得到三次掌聲㗎！其中一次係我拗柴，可能大家覺得我抵死。」他和翠如更是各有一隻腳扭傷，笑稱「一人拗一柴」！

江嘉敏安慰Tiffany

劉穎鏇（Tiffany）和胡㻗疑似秘交斷正，與Tiffany份屬好姊妹的江嘉敏表示已發短訊慰問對方。那她可相信二人拍拖？江嘉敏表示不清楚，但對於二人被指「車震」，她即皺眉說︰「唔好用呢個字啦，好衰呀！」

採訪︰Pauline

編輯︰黃卉彤

美術︰梁政敏