兩大校長杯足球賽 新任校長齊落場

踢波除咗有益健康，仲可以增進友誼！中大同港大合辦嘅第15屆兩大校長杯教職員足球友誼賽，噚日上晝喺中大夏鼎基運動場舉行，由中大校長段崇智同埋港大校長張翔主持開球禮，今次仲係兩大校長上任後首次出席足球賽！每位參加者都表現落力，黛安喺現場都感受到嗰份刺激，結果係中大贏港大2比0。

黛安知道，今年係中大55周年校慶，所以中大就特別設計咗兩件「特別紀念版」球衣，球衣正面印有55周年標誌，背後亦印上「55」。段崇智就着咗其中一件「特別紀念版」球衣出席開球禮，仲喺典禮上送咗另一件球衣畀張翔，充分體現咗「比賽第二，友誼第一」。

兩大校長盃足球賽喺2003年首度舉行，以誌中大同埋港大齊心協力抗非典型肺炎，從此就成為咗兩間大學一年一度嘅體育盛事，同時促進兩校教職員嘅友誼同埋合作精神。連同噚日嘅賽事，中大一共贏咗10場比賽，港大就贏過1場比賽，另外4次係打成平手。